广州点心 萨其马与冰花蛋散

　　萨其马(俗称马仔)同冰花蛋散，系广州点心中嘅两款甜点,用料、制作、风味都较为接近，惟型格唔同啫；原料以面粉、鸡蛋、麦芽糖为主,先搓好面团，再打薄，再切，再炸，再上糖浆。每个工序都好考师傅口架，特别系最后上糖浆嗰一关，糖浆嘅浓度把握系重中之重。

　　先讲马仔:糖浆嫩则散，难以成型,盏等收档；糖浆老则硬,切唔开，亦系等收档；只有啱啱好先至有型有款,攞得上台卖。再讲冰花蛋散:糖浆嫩则有如水过鸭背，一阵间糖浆就泻晒落碟底；糖浆老则食时你咬佢一啖佢咬返你一啖；惟有啱啱好先至晶莹透亮。品质好嘅萨其马噍落去藕断丝连、酥中带软、软中带化、香甜可口。

　　萨其马系以前茶楼必有品种,不过呢家就唔多见喇。唔使审,又系嫌功夫多，或者怕衰唔敢整，哪怕佢哋比咸煎饼、笑口枣高档咗。不过就算有,我都要斟酌过，睇下嗰间茶楼嘅卫生状况再决定食唔食。

　　点解呢?如上所述,萨其马有别于一般点心嘅最后先加温,而系加温(炸过)之后仲有几个环节，包括存放、上糖胶、造型、切件(成品)等,媒介物既多,又全经人手，之后直接到肚，一旦唔够卫生就肚仔痛痛喇。

　　但吊瘾嘅街坊依然可以一饱口腹口架，各大超市嘅“沙琪马”都食得下口架。虽然未必如传统真材实料，但技艺都算过骨,更重要嘅系，睇落去企理啲、放心啲。